ജയേഷ് പണിക്കർ
ഭാവങ്ങളേകുന്നീ വർണ്ണങ്ങളും
ഭാഗ്യമിവയെന്നു ചിലരങ്ങനെ
ഏഴു വർണ്ണങ്ങൾ തൻ ചാരുതയാൽ
ഏകുന്നൊരാ മാരിവില്ലതെന്നും
മോഹത്തിൻ തരുവിനെ
മോടിയോടെന്നും വളർത്തിടുന്നു
ഹൃദ്യമായീടുന്നതീ പ്രപഞ്ചം
എന്നുമീ വർണ്ണത്തിൻ വൈഭവത്താൽ
ആകാശനീലിമയിൽ ആഴിയിലെന്നും
ആരും കൊതിക്കുമീ നീലവർണ്ണം
ഹൃദ്യമാം കാഴ്ചകളേകുന്നിതാ
നിത്യഹരിതമീ ഭൂമിയെന്നും
വെൺമേഘജാലം ചിറകതോടെ
വിണ്ണിലങ്ങാകെ പറന്നിടുന്നു
പീതവർണ്ണത്തിലാ പൂക്കളെന്നും
പ്രീതിയതെങ്ങും നിറച്ചിടുന്നു
ശോകാർദ്രമായതാം ഭാവമോടെ
ശോണ നിറമോടെ സന്ധ്യയെത്തി
എത്ര മനോഹരമീ വർണ്ണങ്ങൾ
ചിത്രമൊരുക്കുന്നു ചുറ്റുമെന്നും
